सहकारी संस्थाबाट ऋण लिएर नतिरेपछि ठगी गरेको अभियोगमा नेकपा एमालेका नेता कृष्ण अर्याल पक्राउ परेका छन् ।
दीगो पर्यटन सहकारी संस्था बाट लिएको ऋण नतिरेपछि अदालतबाट दोषी ठहर अर्याललाई सोह्रखुट्टे प्रहरी बृत्तको टोलीले बिहीबार पक्राउ गरी काठमाडौं उपत्यका अपराध अनुसन्धान कार्यालयमा बुझाएको छ ।
प्रहरीका अनुसार, आवश्यक अदालतको आदेशअनुसार आवश्यक प्रक्रिया पूरा गरेपछि अर्याललाई सजाय भुक्तानका लागि कारागार चलान गरिनेछ।
अर्याल एमाले पेशागत विशेष प्रदेश कमिटी सदस्य, पर्यटन विभाग सदस्य, तथा उद्योग तथा व्यवसायी विशेष जिल्ला कमिटीका इञ्चार्ज पनित हुन् । उनी पर्यटन बोर्डमा सदस्य भइसकेका नेतासमेत हुन् ।
अर्यालले २०७४ साल जेठ ३० गते सोह्रखुट्टेस्थित दीगो पर्यटन सहकारीबाट ११ लाख ५० हजार रुपैयाँ ऋण लिएका थिए। उनी उक्त सहकारी संस्थाको सञ्चालक समिति सदस्य पनि थिए । सञ्चालक भएर पनि ऋण लिएर नतिरेपछि सहकारीले अदालतमा मुद्दा हालेको थियो ।
ऋणबारेमा सहकारीले वर्षौंसम्म पटक–पटक मौखिक र लिखित ताकेता गरेको थियो। तर उनले साँवा ब्याज दुवै नतिरेपछि सहकारी २०७९ पुस ४ गते काठमाडौं जिल्ला अदालतमा ठगी मुद्दा हालेको थियो।
अदालतले २०८० असार २७ गते अर्याललाई रकम भुक्तानी गर्न आदेश पनि दियो । तर त्यसपछि पनि सहकारीले किस्ताबन्दीमा तिर्न आग्रह गर्यो । ब्याजसहित रकम बुझाउन बारम्बार आग्रह गर्दा पनि अर्यालले टेर्दै नटेरेको संस्थाका सचिव प्रल्हाद लोहनीले सञ्चारकर्मीहरूलाई बताएका छन् ।
त्यहीकारण सहकारीले जनताको बचत सुरक्षित जोगाउन अदालतको आदेश कार्यान्वयन गर्नुपर्ने अवस्था आएको लोहनीले बताए ।
सहकारी संस्थाले राजनीतिक पहुँचको आडमा रकम तिर्नै नचाहेपछि अर्यालविरुद्ध कानुनी प्रक्रियामा जानु परेको जनाएको छ ।
Discussion about this post