रवि लामिछानेको हेर्दाहेर्दैमा राखिएको रिटको सुनुवाइ जारी, आज आदेश आउने सम्भावना

राष्ट्रिय स्वतन्त्र पार्टीका सभापति रवि लामिछानेको बन्दी प्रत्यक्षीकरण रिटमाथि सर्वोच्च अदालतमा सुनुवाइ सुरु भएको छ । न्यायाधीशद्वय नहकुल सुवेदी र बालकृष्ण ढकालको संयुक्त इजलासमा रिटमाथि सुनुवाइ भएको हो ।

हेर्दाहेर्दैमा राखिएको रिटमा शुक्रबार सुनुवाइ सकिने सम्भावना छ । शुक्रबार वरिष्ठ अधिवक्ता सुरेन्द्र भण्डारीले लामिछानेविरुद्ध जाहेरी दिने जाहेरवालाका तर्फबाट बहस गरिरहेका छन् ।यसअघि लामिछानेका तर्फबाट र सरकारी वकिलको बहस सकिएको छ । जाहेरवालातर्फको बहस सकिएपछि आदेश आउनेछ । शुक्रबार बहस सकिएर आदेश आउने सम्भावना छ ।सहकारी ठगी प्रकरणमा उच्च अदालत तुलसीपुरको बुटवल इजलासले जिल्ला अदालत रुपन्देहीको धरौटीमा रिहा गर्ने आदेश उल्ट्याउँदै पुर्पक्षका लागि थुनामा राख्ने आदेश दिएपछि लामिछाने बन्दी प्रत्यक्षीकरणको रिट लिएर सर्वोच्च पुगेका थिए ।