रवि आफ्नो पक्षमा माहोल बनाउने प्रयासमा

५ वैशाख, भरतपुर (चितवन) । ४ मंसिरको आम चुनाव अघि रवि लामिछाने चितवनमा निस्किँदा घन्टीको मात्र आवाज सुनिथ्यो । युवा, महिला मात्र होइन, वृद्धवृद्धाहरु पनि स्वतः स्फूर्त सडकमा निस्किएका देखिन्थे ।

तर, पाँच महिनापछि दोस्रो पटक हुन लागेको चुनावमा परिस्थिति फेरिएको छ । सोमबार चितवनमा लामिछानेको घरदैलो र सभा पछ्याउँदा पहिलेजस्तो अत्यधिक भीड थिएन । विगतझैँ घर–घरबाट घन्टी बोकेर निस्किनेको जमात पनि देखिएन ।

भरतपुर महानगरपालिका–२, आँपटारीमा आयोजित सभामा लामिछाने पुग्नुअघि उनका चालक दिलबहादुर थापा (शम्भु) तीन तलामाथिबाट खसेर गम्भीर घाइते भएको खबर बाहिरियो । ‘दशा नै पो लागेको छ कि क्या हो ’, एकपछि अर्को समस्या आइलागेको गरेको संकेत गर्दै आँपटारीकी ७६ वर्षीय दौलती विश्वकर्माले भनिन्, ‘गाह्रो पार्छन् जस्तो छ ।

विश्वकर्मा बोलिरहँदा निलो झण्डा राखिएको मिनी बसमा राष्ट्रिय स्वतन्त्र पार्टीका कार्यकर्ताहरु आइपुगे । लामिछाने आएका हुन् कि भनेर सडक छेउ जम्मा भएकाहरुले नजर लगाए । तर, त्यहाँ कार्यकर्ता मात्र थिए ।

केहीबेर अघिसम्म २०÷२२ जना मात्र देखिएको सभा स्थल एकाएक खचाखच भयो, सडक नै छेकियो । ‘राष्ट्रिय स्वतन्त्र पार्टीले गर्ने नै यही हो, मान्छेहरु सबैतिरबाट बोकेर ल्याएका हुन्छन्’, भरतपुरका कांग्रेस समर्थक बलराम अधिकारी आरोप लगाउँछन्, ‘त्यो देखेर मुख्य दलका नेताहरु डराएका छन् ।