- अर्घाखाँचीमा बाँदर र बँदेलका कारण कृषकले भोग्दै आएको क्षति न्यूनीकरण गर्नका लागि २० जनालाई ‘वन्यजन्तु हेरालु’ का रूपमा रोजगारी दिइएको छ। डिभिजन वन कार्यालय अर्घाखाँचीले आइतबार सार्वजनिक गरेको सूचिअनुसार २० जनालाई छनोट गरिएको हो।
वन कार्यालयले सोमवार उनीहरूलाई औपचारिक सम्झौता र अभिमुखीकरण कार्यक्रममा सहभागी हुन बोलाएको छ। समयमै नआएमा सम्झौता अमान्य हुने जनाइएको छ।
कार्यक्रमको उद्देश्य स्थानीय किसानको खेतीलाई वन्यजन्तुबाट जोगाउनुका साथै मानव–वन्यजन्तु सहअस्तित्वलाई प्रवर्द्धन गर्नु रहेको छ।
यो पहल डिभिजन वन कार्यालय र यस अन्तर्गतका वन व्यवस्थापन कार्यमा संलग्न सामुदायिक वन समूहहरूको साझेदारीमा अघि बढाइएको हो। सामुदायिक वन समूहहरूको कोषमा पर्याप्त आय मौज्दात रहेको जनाउँदै, यही स्रोत प्रयोग गरेर हेरालु नियुक्त गर्ने निर्णय गरिएको हो।
वन कार्यालयका अनुसार बाँदर र बँदेलको उपद्रव बढ्दै गएपछि यस्तो संयन्त्र ल्याइएको हो, जसले दीर्घकालीन रूपमा वन्यजन्तु र मानवबीचको द्वन्द्व घटाउने विश्वास गरिएको छ।
Discussion about this post