जारी सिजनमा स्पेनिस ला लिगा, इटालियन सिरि ए र जर्मन बुन्डेस लिगाको उपाधि छिनोफानो भइसकेको छ ।
स्पेनमा रियल मड्रिड, इटालीमा इन्टर मिलान र जर्मनीमा बायर लेभरकुजनले घरेलु लिगको उपाधि चुमिसकेका छन् ।
तर विश्वमा सर्वाधिक लोकप्रिय मानिने इङ्लिस प्रिमियर लिगको उपाधि भने अझै छिनोफान भइसकेको छैन ।
उपाधिको छिनोफानोका लागि विश्वभरका समर्थकहरूले अन्तिम खेल नै कुर्नुपर्ने भएको छ ।
सबैभन्दा प्रतिस्पर्धात्मक मानिने इङ्लिस प्रिमियर लिगमा यो सिजन पनि त्यस्तै भएको छ ।
लिग कसले चुम्छ भन्ने टुंगो आइतबार राति ८ बजेर ४५ मिनेटदेखि एक साथ १० वटै खेल सुरु भएपछि मात्रै लाग्ने भएको छ ।
इङ्लिस प्रिमियर लिगको जारी सिजनको उपाधि भिडन्त नकआउट फुटबलको फाइनल जस्तै हुन पुगेको छ । किनभने उपाधि होडको अन्तिम दौडमा डिफेन्डिङ च्याम्पियन म्याचेस्टर सिटी र सन् २००३/०४ यता खाली हात रहेको आर्सनल छन् ।
उता लिभरपुल भने यसअघि नै उपाधि होडबाट बाहिरिएको छ । उसका प्रशिक्षक जुर्गेन क्लोप यो सिजन पनि उपाधिविहीन हुँदै क्लबबाट बाहिरिएका छन् ।
यस्तोमा आइतबार राति हुने लिगको अन्तिम अर्थात् ३८ औं चरणको खेलबाट लिग उपाधिको टुंगो लाग्ने भएको छ ।
लिगमा ३७ खेलबाट ८८ अंकसहित शीर्ष स्थानमा रहेको म्यानचेस्टर सिटीले वेस्ट ह्यामको सामना गर्दैछ । यो खेल सिटीको घरेलु मैदानमा हुँदैछ ।
उता उपाधि होडका क्रममा वेस्टह्यामविरुद्ध सिटीको हारको कामना गरिरहेको आर्सनलले पनि एभर्टनलाई घरेलु मैदानमा स्वागत गर्दैछ । आर्सनल ३७ खेलबाट ८६ अंकसहित दोस्रो स्थानमा रहेका उपाधि जित्न उसले सिटीको हारको कामना गरेर मात्रै पुग्दै आफूले पनि स्पष्ट जित निकाल्नुपर्नेछ ।
सिटी लगातार तीन सिजनको च्याम्पियन हो । यस्तोमा सिटीले अन्तिम दिनको खेलमा वेस्टह्यामलाई हराए स्वत: उपाधि उसकै पोल्टमा जानेछ । बराबरी गरे आर्सनलको नतिजा कुर्नु पर्छ । आर्सनल पराजित भएमा उपाधि स्वतः सिटीले जित्ने छ । यदि सिटीले हारेर आर्सनलले स्पष्ट जित निकालेमा मात्रै उपाधि लण्डनमा बस्नेछ ।
सिटी लगातार चौथोपटक उपाधि जित्न तम्तयार रहँदा आर्सनललाई २० वर्षदेखिको उपाधिको खडेरी तोड्नुछ । यदि सिटीले जितेमा इङ्ल्यान्डमा माथिल्लो डिभिजनको सय वर्ष पुरानो इतिहासमा लगातार चार पटक उपाधि जितेको कीर्तिमान बन्ने छ ।
पेप ग्वार्डिओलाको कमानमा रहेको सिटीले गत सिजन ट्रिबल जितेर कीर्तिमान बनाएको थियो । यस पटक लिग उपाधि जिते उनले अर्को दुर्लभ कीर्तिमान बनाउने छन् ।
सिटीले आफ्नो शानदार लयलाई कायम राख्ने क्रममा ३७ औँ चरणको खेलमा टोटनहमलाई हराएको थियो । जुन खेलमा सिटीको हारको कामनामा आर्सनल र उसका फ्यान थिए । सिटीले टोटनहमलाई हराएसँगै एस्टन भिल्ला तालिकाको चौथो स्थानमा रहेर युरोपेली च्याम्पियन्स लिग खेल्ने भएको छ ।
Discussion about this post