नेपालमा डिशहोम गोबाट एनपीएल हेर्न कति तिर्नुपर्ने, ?

काठमाडौँ । डिशहोम गो एपबाट नेपाल प्रिमियर लिग (एनपीएल) को दोस्रो सिजन हेर्न प्रति डिभाइस तीन सय रुपैयाँ तिर्नुपर्ने भएको छ । १ मङ्सिरबाट सुरु हुने एनपीएल दोस्रो सिजन ओटीटीबाट प्रसारण गर्ने अधिकार डिशहोम गो एपले पाएसँगै कम्पनीले शुल्क निर्धारण गरेको हो ।

खाडी राष्ट्रमा बस्नेहरूले डिशहोम गो एपबाट एनपीएल हेर्न पाँच सय रुपैयाँ तिर्नुपर्नेछ । त्यस बाहेकका अन्य सबै देशहरूमा प्रति डिभाइस १० अमेरिकी डलर शुल्क तिर्नुपर्नेछ । भारतसँगै नेपालमा स्टार स्पोर्टस टेलिभिजन च्यानलमा एनपीएलका खेल हेर्न सकिनेछ । एउटा नेपाली च्यानलको टुङ्गो शनिबार लाग्दैछ ।

क्यानले ४ नोभेम्बरमै भारत बाहेकका सबै देशहरूमा एनपीएल प्रसारणका लागि ओटीटी प्लेटफर्ममार्फत एक्सक्लुसिभ अधिकार बिक्री गर्न टेन्डर खुलाएको थियो । जसमा डिशहोम गो एप छनोट भएको हो । युट्युबबाट भने एनपीएलका खेल प्रसारण हुने छैनन् ।

डिशहोम गो एप मोबाइल, एन्ड्रोइड टिभी र वेब गरी तीनै माध्यममा उपलब्ध हुनेछ । दर्शकहरूले खल्ती, इसेवा, भिसा वा मास्टरकार्ड मार्फत सजिलै भुक्तानी गरी विश्वभरबाट एनपीएलको सब्स्क्रिप्सन लिन सक्ने डिशहोमले जनाएको छ ।

साथै, डिशहोम गोको नयाँ संस्करण एप गुगल प्ले स्टोरमा उपलब्ध भएको छ । प्रयोगकर्ताहरूले नयाँ एप प्ले स्टोरबाट डाउनलोड गर्न सक्ने र आईओएस प्रयोगकर्ताका लागि नयाँ एप केही दिनमा लाइभ हुने कम्पनीले जनाएको छ ।

गुगल प्ले स्टोरमा डिशहोम गो एप डाउनलोड गर्न यहाँ क्लिक गर्नुहोस् र आईओएसका लागि यहाँ क्लिक गर्नुहोस् ।

उच्च गुणस्तरको र अवरोध रहित प्रत्यक्ष प्रशारण सुनिश्चित गर्न डिशहोमले मोबायोटिक्स (Mobiotics) र अकामाई (Akamai) सँग प्राविधिक सहकार्य गरेको छ । मोबायोटिक्स धेरै प्रयोगकर्ताले प्रयोग गर्ने अनलाइन प्रसारण प्रणाली (ओटीटी) निर्माण गर्ने कम्पनी हो । यसले तयार पारेको प्लेटफर्म प्रयोग गरेर आईसीसी च्याम्पियन्स ट्रफी २०२५ मा बङ्गलादेश र भारतबिचको खेल एकै पटक २३ लाखभन्दा बढी बङ्गलादेशी दर्शकले सहजै हेरेका थिए ।

त्यस्तै, अकामाई विश्वकै अग्रणी क्लाउड सेवा प्रदायक हो, जसले भारतमा आईपीएलको डिजिटल प्रसारणका लागि ‘हटस्टार’ सँग सहकार्य गर्दै आएको छ । अकामाईको मुख्य काम इन्टरनेटमा सामग्री छिटो, सुरक्षित र भरपर्दो तरिकाले प्रयोगकर्तासम्म पुर्‍याउनु हो । यसले विश्वभरका सर्भरहरू प्रयोग गरेर वेबसाइट र एपको उच्च गुणस्तर र अवरोध रहित सञ्चालनलाई सुनिश्चित गर्छ ।