सत्तारूढ नेपाली कांग्रेस र नेपाल कम्युनिस्ट पार्टी (एमाले)बीच असन्तुष्टि बढ्दै गइरहेको छ । दुई दलबीच दूरी बढेसँगै सरकार हेरफेरको चर्चासमेत सुरु भएको छ ।
प्रधानमन्त्रीसमेत रहेका एमाले अध्यक्ष केपी शर्मा ओली र कांग्रेस सभापति शेरबहादुर देउवाका बीचमा पछिल्लो समय असन्तुष्टि बढेको हो । सरकार गठनअघि दुई दलबीच भएको सातबुँदे सहमति, राजनीतिक दल विभाजनका लागि ल्याउन खोजिएको अध्यादेश, कुलमान घिसिङलाई हटाउन भइरहेको खेल र अन्तर्राष्ट्रिय सम्बन्ध गिजोल्न खोजिएको विषयमा ओली र देउवाको तालमेल मिलेको छैन ।
प्रधानमन्त्री ओली ‘संविधान संशोधनबाट ब्याक’ भएपछि सत्तारूढ कांग्रेसले त्यसमा आपत्ति जनाएको छ । ओलीले तत्काल संविधान संशोधन नहुने भन्दै २०८७ मा मात्रै संविधान संशोधन हुने बताएपछि कांग्रेस नेताहरू असन्तुष्टि पोखिरहेका छन् ।
गत १७ असारको मध्यराति नेपाली कांग्रेस र एमालेबीच भएको सातबुँदे सहमतिमा संविधान संशोधन गर्ने एजेन्डासमेत छ । तर, दुई दलबीच भएको सहमतिविपरीत प्रधानमन्त्री ओलीले अभिव्यक्ति दिएको भन्दै कांग्रेसले आपत्ति जनाएको छ ।
सहमति पालना गर्नुको साटो आफूखुसी अभिव्यक्ति दिएपछि कांग्रेस नेता एवं प्रतिनिधिसभा सदस्य अर्जुननरसिंह केसीले प्रधानमन्त्री ओलीले सातबुँदे सहमतिको अपमान गरेको टिप्पणी गरेका छन् ।
‘अहिले जो २०८७ मा भनेर प्रधानमन्त्रीले भन्नुभएको छ । मैले असजिलो नमानी यो सातबुँदेको अपमान हो भन्छु । २०८७ मा पुग्ला, ९० मा पुग्ला तर प्रारम्भ गर्नुप¥यो । त्यसका निम्ति सबै पक्षहरू, संसद्मा भएका दलहरू मात्रै होइन, सांसदबाहिर रहेका शक्तिलाई पनि कसरी जुटाउन सक्छौं हामी ?’ उनले भने ।
प्रधानमन्त्री ओलीको सो अभिव्यक्तिलाई लिएर केसी मात्रै नभई महामन्त्री विश्वप्रकाश शर्मालगायतका नेताहरूले आपत्ति जनाएका छन् । यस विषयमा कांग्रेस सभापति देउवासमेत असन्तुष्ट रहेको स्रोतको भनाइ रहेको छ ।
यस्तै, अर्को विषय राजनीतिक दलसम्बन्धीको अध्यादेशका ’boutमा समेत सहमति जुटेको छैन । प्रधानमन्त्री ओलीले मुख्यतः एमालेबाटै विभाजन भई माधवकुमार नेपालको नेतृत्वमा गठन भएको नेकपा (एकीकृत समाजवादी) विभाजन गराउने उद्देश्यले अध्यादेश ल्याउन खोजेका छन् । तर, कांग्रेस सभापति देउवा त्यसमा सहमत छैनन् । नेपालसँगको नजिकको सम्बन्ध र विगतमा आफूलाई प्रधानमन्त्री बनाउन गरिएको सहयोगका कारण देउवा नेपाल नेतृत्वको दल विभाजनका लागि अध्यादेश ल्याउने’boutमा सहमत नभएका हुन् ।
यसैगरी, अर्को विषय कुलमान घिसिङलाई हटाउने भइरहेको चलखेलप्रति देउवा असन्तुष्ट छन् । देउवाले कुलमानलाई हटाउने बाटामा जाँदा जनतामा चरम आक्रोश पैदा हुने भन्दै सचेत गराएका छन् । तर पनि ओली कुलमानलाई जसरी पनि हटाउन लागेका छन् ।
ऊर्जा मन्त्रालयको नेतृत्व कांग्रेसबाट दीपक खड्काले सम्हालेका छन् । तर, मन्त्री खड्का र कुलमानबीच ठूलो टसल देखिएको छ । मन्त्री खड्का जसरी पनि कुलमानलाई बर्खास्त गर्ने बाटामा छन् । प्रधानमन्त्री ओलीले कुलमान हटाउने विषयमा देउवाको साथ खोजेका छन् । तर, देउवा अहिलेसम्म तयार नभएको स्रोतको दाबी छ ।
यता, अन्तर्राष्ट्रिय सम्बन्धलाई लिएर पनि ओली र देउवाबीच असमझदारी बढ्दै गइरहेको छ । ओलीसँग देउवा अन्तर्राष्ट्रिय सम्बन्ध बलियो बनाउनुपर्ने र सम्बन्ध गिजोल्न नहुनेमा सजग छन् । देउवाले प्रधानमन्त्रीले अभिव्यक्ति दिँदा सन्तुलित खालको दिनुपर्ने मत राख्दै आएका छन् ।
एउटा छिमेकीलाई चिढ्याउने र अर्कोलाई खुसी पार्ने कूटनीति अपनाउन नहुने देउवाको मत छ । छिमेकी मित्र चीन र भारतसँगको सम्बन्धलाई लिएर ओली र देउवाबीच असमझदारी बढेको छ । यसमा एमालेभित्र चीनको बढ्दै गइरहेको चासोले समेत नेताहरू चिढिएका छन् ।
सरकार बनेको ६ महिना व्यतीत हुन लाग्दासमेत अर्थतन्त्रमा देखिनेगरी सुधारको संकेत नदेखिएको भन्दै देउवाले असन्तुष्टि पोख्ने गरेका छन् । कांग्रेसकै अर्थविद्हरूले समेत सार्वजनिक रूपमै अर्थतन्त्र लयमा फर्किन नसकेको र दिनदिनै अवस्था खराब बनेको टिप्पणी गरिरहेका छन् ।
कांग्रेसभित्र संसद्को हिउँदे अधिवेशन तत्कालै बोलाउनुपर्ने माग बढेको छ । राष्ट्रिय तथा अन्तर्राष्ट्रिय परिस्थितिको मूल्यांकन गरिरहेका देउवाले ओलीसँग कसरी सम्बन्धविच्छेद गर्नेमा आफू निकटका नेतासँग गम्भीर छलफलमा छन् ।
Discussion about this post