अनमोल केसी नेपाली फिल्मका सफल र महँगा नायकमध्ये एक हुन् । उनले लिने पारिश्रमिक नै फिल्म प्रचारको मसला बन्छ ।
पहिलो पटक ५० लाख पारिश्रमिक बुझ्ने नेपाली नायक पनि अनमोल नै हुन् । उनले करिअरको सातौँ फिल्म ‘ए मेरो हजुर’बाट उक्त पारिश्रमिक बुझेका थिए । त्यसयता उनले त्यही आसपास पारिश्रमिक बुझ्दै आएका छन् ।
तर उनले डेब्यू फिल्म ‘होस्टल’बाट डेढ लाख पारिश्रमिक बुझेर अभिनय यात्रा थालेका थिए ।
अभिनयमा जति भिज्दै गयो, उति गाह्रो लाग्ने अनुभव अनमोलसँग छ । नेपाली भाषाको समस्या हटाउन लकडाउनलाई सदुपयोग गरेको उनी बताउँछन् ।
कोरोना महामारीको समयमा भाषामा सुधार गर्न वर्णमाला किनेरै क, ख, ग पढेको उनी बताउँछन् । ‘स्क्रिप्ट पनि नेपालीमा आउँछ, पढ्नै गाह्रो भयो । संवाद बोल्न पनि समस्या हुने भयो,’ उनले सुनाए, ‘त्यही भएर नेपाली भाषा राम्रोसँग पढ्ने निर्णय गरेँ । क, ख, ग र क, का, कि, कीबाटै पढेँ ।’
फिल्ममा अनुबन्ध हुन एकल निर्णय नलिने बानी उनले सुनाए । पहिला थिएटर सकर्लका साथी र बुबासँग सल्लाह लिएर मात्रै फिल्ममा अनुबन्ध हुने रणनीति रहेको उनी बताउँछन् ।
‘हाम्रै उमेरकाले रुचाउने फिल्म धेरै दर्शकले मन पराउने लागेर साथीहरुलाई सुनाउँछु,’ उनी भन्छन्, ‘ड्याडीसँग पनि लामो अनुभव छ, सोध्छु । अनि मेरो राम्रो चाहने निर्देशकहरुसँग पनि सल्लाह लिन्छु ।’
अनमोल आफ्नै रणनीतिमा अघि बढिरहेका छन् । उनले नायक प्रदिप खड्कालाई आफ्नो प्रतिस्पर्धी मान्न तयार छैनन् । ‘मेरो प्रदीप खड्कासँग छ भन्छन्, तर मलाई त्यस्तो लाग्दैन । उहाँ मेरो प्रतिस्पर्धी नै होइन । मेरो ड्याडी मेरो प्रतिस्पर्धी हो, उहाँको फिल्मले सय दिन मनाउथ्यो । सय दिनका लागि म उहाँसँग प्रतिस्पर्धा गर्न चाहन्छु ।’
Discussion about this post