नेपालगञ्ज उपमहानगरपालिकाले सोमबारदेखि चौबिसै घण्टा नि:शुल्क एम्बुलेन्स सेवा सुरु गरेको छ।
उपमहानगरपालिकाले नेपालगञ्जमा बसोबास गर्ने गर्भवती, अशक्त, अपांगसँगै विरामीलाई स्वास्थ्य संस्थासम्म पुर्याउन चाैबिसै घण्टा निशुल्क एम्बुलेन्स सेवा सुरु गरेको हो।
नेपालगञ्जका मेयर प्रशान्त विष्टले एक समारोहका बीच नि:शुल्क एम्बुलेन्स सेवाको उद्घाटन गरे।
सो अवसरमा मेयर विष्टले नेपालगञ्जका जनताको स्वास्थ्य संस्थामा पुग्न नसकेका कारण मृत्यु नहोस् भन्ने उद्देश्यले नि:शुल्क एम्बुलेन्स सञ्चालन गरेको बताए।
उपमेयर कमरुद्दिन राई र प्रमुख प्रशासकीय अधिकृत शिव रिजालले परीक्षणका लागि जनमुखी सेवा सुरु गरेको र यसको प्रभावकारितासँगै अझ सेवा थपिने बताए।
स्वास्थ्य महाशाखाका प्रमुख रामबहादुर चन्दका अनुसार, नेपालगञ्ज उपमहानगरपालिकामा ५ वटा एम्बुलेन्स सधैं तयारी अवस्थामा रहन्छन्। विरामीले फोन गर्ने बित्तिकै ती एम्बुलेन्स जान्छन् र बिरामीले भनेको अस्पतालमा पुर्याइदिन्छन्।
नेपालगञ्जमा मातृ मृत्युदर र नवजात शिशु मृत्युदर उच्च छ। यसमा लुम्बिनी प्रदेशमै बाँके अगाडि आउँछ। गतवर्ष मात्रै नौ जना आमाको मृत्यु भएको छ। नि:शुल्क एम्बुलेन्स सेवाले मातृ मृत्युदर र नवजात शिशु मृत्युदर घटाउन सहयोग पुर्याउने चन्दको विश्वास छ।
Discussion about this post