प्रहरी हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानले आफूलाई रातारात अपहरण शैलीमा पोखरा ल्याइएको बताएका छन् ।
आइतबार कास्की जिल्ला अदालतका न्यायाधीश हिमलाल बेल्बासेको इजलासमा आफ्नो धारणा राख्दै रविले एकपटक स्वास्थ्य परीक्षण त गरिदिनुस् भनेर आग्रह गर्दा पनि सुनुवाई नभएको गुनासो गरे । उनले चितवनमा आफ्नो स्वास्थ्य अवस्था कमजोर हुँदा पनि बयानका लागि तयार भएको न्यायाधीश समक्ष बताएका छन् ।
उनले भने, ‘ चितवन पु-याएकै दिन बयान सुरु भयो। टाउको दुखिरहेको थियो। तरपनि बयान दिएँ। भोलिपल्ट पनि बिहानबाटै बयान भयो। बिहान करिब साँढे ८ बजेबाट राति ९ बजेसम्म बयान भयो। दोस्रो दिन पनि टाउको दुखेको निको भएको थिएन, मैले एसपी/डीएपीकै औषधि खाएको थिएँ। गाह्रो हुँदा पनि बयानमा सहयोग गर्दिन भनिन। राति अबेर मलाई सरकारी वकीलको कार्यालयबाट जिल्ला प्रहरी कार्यालय फर्काइयो।’
साथै रविले चितवनबाट पोखरा लाने क्रममा एक जना प्रहरीले मदिरा सेवन समेत गरेको बताएको छन् । आफूलाई प्रहरीले जबरजस्ती हात तान्नदै गाडीमा राखेको पनि रविले बताएका छन् ।
‘मलाई गाह्रो भएको छ आरम गर्न दिनुस् भनेर पटकपटक आग्रह गरे। बिहान तपाईंकै अगाडि औषधि खाएको छु, मेरो प्रेसरको अवस्था त्यो अवस्थामा थियो, तपाईंहरुले थाहा पाइहाल्नुभयो होला। मलाई अस्पताल लगेर चेक गर्नुस् भनें। तर, उहाँहरुले सुन्नु भएन। लैजाने नै भए मेरो परिवार, वकील र पार्टीका साथीहरुलाई जानकारी दिनुस्, एक कल मात्र गर्न दिनुस् भनें तर उहाँहरुले दिनुभएन। कसैलाई खबर गर्न दिनु भएन। त्यसपछि केही प्रहरी आएर जाउँजाउँ भन्दै मेरो हात तान्न थाले। आएकामध्ये एकजना बोल्दा मदिराको गन्ध आयो, मलाई नछुनुस् भन्दै म बिस्तारै तल ओर्लिएँ ’ उनले भने ।
Discussion about this post