साताको पहिलो दिन आइतबार नै सेयर बजार घटेको छ। आइतबार ५३.६३ अंकले घटेर बजार २६९५.९३ विन्दुमा आइपुगेको हो।
यो सहित नेप्सेले उच्च बन्द विन्दु ३००१ बाट ३०५ अंक गुमाइसकेको छ।
अन्तरदिनको कारोबारमा २७ सय विन्दुबाट तल आउने प्रयास पटक–पटक कमजोर भए पनि बजार बन्दा हुँदा भने केही तल आइपुग्यो।
यद्यपि अहिले पनि २७ सयको विन्दु लगानीकर्ताको मनोवैज्ञानिक विन्दुमै बसेको देखिन्छ।
यसदिन कारोबार रकममा पनि कमी आएको छ।
बिहीबार १२ अर्ब २४ करोड रूपैयाँको सेयर कारोबार भएकोमा आइतबार १० अर्ब ५१ करोड रूपैयाँको कारोबार भएको छ।
अघिल्लो दिनको तुलनामा कारोबार रकममा १ अर्ब ७३ करोड रूपैयाँ कमी आएको हो।
आइतबार ३१ कम्पनीको सेयर मूल्य बढेको छ भने २०९ वटाको घटेको छ। यस्तै, चार कम्पनीको सेयर मूल्य स्थिर रहेको छ।
यसदिन सुपर माइ हाइड्रोपावरको सेयर मूल्य सर्वाधिक १० प्रतिशतले बढेर प्रतिकित्ता मूल्य एक हजार ५६ रूपैयाँ कायम भएको छ।
यसैगरी, हिमालयन पावर पार्टनरको मूल्य ९.८७ प्रतिशतले बढेर प्रतिकित्ता मूल्य ४२३ रूपैयाँ पुगेको छ।
यस्तै, पिप्ल्स हाइड्रोपावर र माइ खोला हाइड्रोपावरको मूल्य सर्वाधिक १० प्रतिशतका दरले घटेर प्रति कित्ता मूल्य क्रमशः ४०६ रूपैयाँ ८० पैसा र ६१२ रूपैयाँमा झरेको छ।
थ्री स्टार हाइड्रोपावरको मूल्य ९.९९ प्रतिशतले घटेको छ।
उक्त कम्पनीको मूल्य एक हजार ९९७ रूपैयाँ २० पैसा कायम भएको छ।
आइतबार गुडविल फाइनान्सको सर्वाधिक कारोबार भएको छ।
कम्पनीको प्रतिकित्ता मूल्य एक हजार २३० रूपैयाँमा ५२ करोड ३१ लाखको सेयर कारोबार भएको छ।
यो मूल्य अघिल्लो दिनको तुलनामा ४.४१ प्रतिशत बढेको हो।
सर्वाधिक सेयर खरिद–बिक्री हुने दोस्रो कम्पनीमा हिमालयन रिइन्स्योरेन्स रहेको छ। उक्त कम्पनीको प्रतिकित्ता ८६१ रूपैयाँमा ३३ करोड ४३ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये म्युचुअल फण्ड समूहको परिसूचक ०.८० प्रतिशतले बढेको छ भने बाँकी १२ समूहको परिसूचक घट्दा समग्र नेप्से घटेको हो।
यसदिन वित्त समूहको परिसूचक सर्वाधिक ३.४४ प्रतिशतले घटेको छ भने दोस्रोमा होटल्स तथा पर्यटन समूहको परिसूचक २.९८ प्रतिशतले घटेको छ।
Discussion about this post