खाना बनाउनका लागि हामी तेलको प्रयोग गर्छौँ । तेललाई तरकारी बनाउन, फ्राई गर्न वा डिप फ्राई गर्न प्रयोग गरिन्छ । धेरै जसो परिकार बनाउनका लागि धेरै तेलको आवश्यकता हुँदैन । तर, डिप फ्राई गर्नको लागि धेरै तेल प्रयोग गरिन्छ ।
पुरी, पकौडा वा मासुजस्ता कुराहरू डिप फ्राई गर्दा ती चीजहरूका कणहरू तेलमा मिसिन्छ । यसले तेल कालो र फोहोर देखिने गर्दछ । यसले गर्दा यो तेल फ्याँक्ने एउटै तरिका जस्तो देखिन्छ । तर, यस तेललाई पुनः प्रयोग गर्ने अन्य धेरै तरिका पनि छन् । आज हामी बाँकी रहेको कुकिङ तेलको कसरी पुनः प्रयोग गर्न सकिन्छ यसबारे बताउनेछौँ-
पहिले उक्त तेल सफा गर्न आवश्यक हुन्छ । यसका लागि प्रयोग भैसकेको तेललाई चिसो हुन दिनुपर्छ । त्यसपछि तेललाई छान्नुहोस्, जसले गर्दा फोहोर कण छान्नीमा रहन्छ र सफा तेल भाडामा आउँछ । यो तेललाई हल्का तातो पारेर सफा कन्टेनरमा स्टोर गरेर राख्न सकिन्छ । त्यसपछि यो तेल पुनः प्रयोगको लागि लागि तयार हुन्छ ।
तड्कामा प्रयोग
बचेको तेल चामल वा दाल जस्ता पदार्थमा तड्का लगाउन प्रयोग गर्न सकिन्छ । विशेष गरी फ्राइड राइस बनाउन यस तेलको प्रयोग गर्न सकिन्छ । केही मांसाहारी परिबार बनाउनमा पनि यस तेललाई प्रयोग गर्न सकिन्छ ।
फर्निचर सफा गर्न
खानपानमा मात्र होइन, अन्य थुप्रै तरिकामा पनि यस बचेको तेलको प्रयोग गर्न सकिन्छ । तपाईं यस तेललाई फर्निचर पोलिस गर्न प्रयोग गर्न सक्नुहुन्छ । तेलमा सेतो भिनेगर मिसाएर यसलाई सफाइको लागि प्रयोग गर्न सकिन्छ ।
जनावरको खानामा
यो तेललाई जनावरलाई दिइने खानामा हल्का तेल छर्किन प्रयोग गर्न सकिन्छ । यो विशेषतः पशुहरूको आहारमा ऊर्जा र पोषणको स्रोतका रूपमा प्रयोग गर्न सकिन्छ ।
नगर्नुहोस् यो गल्ती
प्रयोग भैसकेको तेललाई भान्साको सिंकमा नफ्याल्नुहोस् । यदि तातो तेल सिंकमा फ्यालियो भने यसले सिंकको पाइपलाई जलाउन सक्छ । साथै, तेल र यसको फोहोर भान्साको पाइपमा चिप्किएर पानीको बहाव रोक्न सक्छ । यसले पाइपमा फोहोर जम्मा हुन्छ जसलाई सफा गर्न गाह्रो हुन्छ ।
Discussion about this post