ताइवान । कसैले आफ्नो पत्नीको अनैतिक सम्बन्धको पर्दाफास गर्यो भने अदालतले के भन्ला ? पक्कै पनि सम्बन्ध विच्छेदका लागि अनुमति दिन्छ होला ।
तर, ताइवानमा परपुरुषसँग लागेकी आफ्नी पत्नीको गतिविधि पत्ता लगाउन खोज्दा एक पुरुषलाई उल्टै सजाय भएको छ । गोप्य क्यामेरा राखेर पत्नीको निजी जीवनमा हस्तक्षेप गरेको भन्दै अदालतले ती पुरुषलाई ३ महिनाको जेल सजाय सुनाएको हो ।
चिनियाँ मिडियामा प्रकाशित यो अनौठो समाचारमा फान थर भएका ताइवानी पुरुष घरमा गोप्य क्यामेरा राखेर आफ्नो पत्नीको अनैतिक सम्बन्धको खुलासा गरेको कारण जेलसम्म पुगेको उल्लेख छ । ती दम्पती लामो समयदेखि विवाह बन्धनमा थिए । उनीहरूको दुई सन्तान पनि थिए ।
तर, सन् २०२२ को सुरुवातमा फानलाई आफ्नो पत्नीको अर्को पुरुषसँग पनि सम्बन्ध रहेको आशङ्का सुरु भएको थियो । आफ्नो आशङ्का मेटाउन उनले घरको बैठक कोठामा रहेको पियानो र सुत्ने कोठामा रहेको कम्प्युटरमा गोप्य क्यामेरा राखेका थिए ।
दुई हप्तापछि क्यामेरा जाँच गर्दा आफ्नो पत्नीलाई अर्को पुरुषसँग सम्बन्ध कायम गरेको अवस्थामा फेला पारेका थिए । उनले उक्त भिडियो फुटेजलाई आधार बनाउँदै सम्बन्ध विच्छेदको माग गरे ।
सन् २०२२ को फेब्रुअरीमा फानले आफ्नो पत्नी र उनको वकिललाई सम्बन्ध विच्छेदबारे छलफल गर्न बोलाए । तर, उनीहरू सहमतिमा पुग्न सकेनन् । त्यसपछि फानले आफ्नो पत्नीविरुद्ध अदालतमा मुद्दा दर्ता गरे ।
तर, उनलाई थाहा थिएन, उनकी पत्नीको पनि अर्कै योजना थियो । उनकी पत्नी नजिकैको प्रहरी चौकी पुगेर आफ्नो सहमति बिना घरमा गोप्य क्यामेरा राखेर आफ्नो निजी जीवनमा हस्तक्षेप गरेको उजुरी दिइन् ।
उनले फानविरुद्ध मुद्दा पनि दर्ता गरिन् । अदालतमा सुनुवाइका क्रममा फानले आफ्नो पत्नी धेरै समय बाथरुममा बिताउने गरेको आफ्नो छोराछोरीले सुनाएपछि उनीहरूका लागि आफूले क्यामेरा राखेको जवाफ दिएका थिए ।
तर, उनको जवाफ न्यायाधीशलाई चित्त बुझेन । गत वर्षको अन्त्यमा ताओयुआन अदालतले फानलाई गोप्य रूपमा र बिना कुनै मान्य कारण अन्य व्यक्तिको निजी जीवन क्यामेरामा कैद गरेको आरोपमा तीन महिनाको जेल सजाय सुनाएको थियो ।
फानले अदालतको निर्णयमा पुनरावेदन पनि गरे । तर, गतको वर्षको अन्त्यमा ताओयुआन उच्च अदालतले तल्लो अदालतको निर्णयलाई सदर गर्यो । अब फानले आफ्नो पत्नीको अनैतिक सम्बन्ध पत्ता लगाएकोमा तीन महिना जेलमा बस्नुपर्ने भएको छ ।
यो अनौठो मुद्दाले चिनियाँ र ताइवानी सामाजिक सञ्जालमा ठुलो बहस सिर्जना गरेको थियो । गोपनीयता र अनैतिक सम्बन्धको प्रमाणको विषयमा सामाजिक सञ्जालमा ठुलै बहस भएको थियो । यसको साथै पारिवारिक जीवनमा आधुनिक प्रविधिको प्रभावको बारे पनि ठुलै छलफल भएको थियो ।
Discussion about this post