चीनको एउटा कम्पनीले हालै आफ्नो ग्राहक सेवा र एक महिलाबिचको मेसेज सार्वजनिक गरेको छ । मेसेजमा महिलाले अनलाइनबाट किनिएको अन्डरवेयर (पेन्टी) लगाउँदा छोरी गर्भवती भएको दाबी गरेकी छिन् ।
ती महिलाले चीनको ठूला अनलाइन रिटेल प्लेटफर्महरूमध्ये एक ‘ताओबाओबाट’ पेन्टी किनेको दाबी गरेकी छिन् । उक्त कम्पनीको ग्राहक सेवासँग सम्पर्क गरी उक्त पेन्टी लगाउँदा आफ्नी छोरी गर्भवती भएको गुनासो गरेकी थिइन् ।
कम्पनीका कर्मचारीहरूले यस्तो कुरा सम्भव नभएको बताउन खोजे पनि महिलाले त्यो नै एक मात्र कारण भएको दाबी गरिन् र स्पष्टीकरण मागिन् । शारीरिक रूपमा असम्भव भएको कुरा बुझाउन कम्पनीका सबै प्रयास असफल भएपछि अन्त्यमा ग्राहक सेवाले उनको कारखानामा महिला मात्र कार्यरत रहेको बताएको छ ।
र, मालिकले भ्यासेक्टोमी गराएका कारण छोरीको गर्भावस्थासँग कम्पनीको कुनै सम्बन्ध नभएको समेत बताएको छ । “तपाईंहरूको अनलाइन स्टोरबाट किनेको पेन्टी लगाउँदा मेरी छोरी गर्भवती भइन्,” ती महिलाले कम्पनीको सामाजिक सञ्जालमा मेसेजमा लेखेकी छिन् । जवाफमा कम्पनीका कर्मचारीहरूले लेखेका छन्, “पेन्टीले गर्भवती हुन सक्ने कुरा असम्भव छ ।”
महिलाले आफ्नो कथालाई सार्वजनिक गर्ने डरले कम्पनीले ती महिलासँगको मेसेज आफैं सामाजिक सञ्जालमा पोस्ट गरेको थियो । यसले मानिसहरूले उनको दाबी कति हास्यास्पद छ भन्ने देखाउन सक्ने कम्पनीको भनाइ छ ।
यो पोस्ट भाइरल भएपछि थुप्रै हाँस्यास्पद टिप्पणीहरू आए । खासगरी महिलाकी छोरी कसरी गर्भवती भइन् भन्ने विषयमा विभिन्न अड्कलबाजी गरिएका छन् । केहीले छोरीले आफ्नी आमाको डरले थाहा नपाएको जस्तो गरेको हुनसक्ने बताएका छन् । केहीले भने सार्वजनिक पोखरीमा पौडी खेलेपछि गर्भवती भएको हुनसक्ने टिप्पणी गरेका छन् ।
यो घटना चौतर्फी चर्चाको विषय बनेपछि कम्पनीका सीईओले कम्पनीको आधिकारिक च्यानलहरूमा पोस्ट गर्दै ती महिलासँग सम्पर्क गर्ने प्रयास गरेको बताए । पछि ती महिला इन्फ्लुयन्सर भएको पत्ता लागेको उनले दाबी गरेका छन् । ती महिलाले यो अजिबको घटना बाहिर ल्याएर मान्छेको ध्यान खिचेर चर्चा कमाउने आशय राखेको बताइएको छ ।
“मलाई यस्ता खालका मान्छे फिटिक्कै मन पर्दैनन्, “ उनले लेखेका छन्, “ती महिलाले चर्चाका लागि कथा बनाएकी हुन् ।” महिलाले क्षणिक चर्चा पाए पनि त्यसले व्यवसायमा ठुलो झट्का लाग्ने उनको भनाइ छ ।
यस्ता अनौठा दाबी बाहिर आउँदा वर्षौं लगाएर स्थापित गरेको व्यवसाय क्षणभरमै चौपट हुने कम्पनीको चिन्ता छ । कम्पनीको कारखाना नै बन्द गराउनका लागि ती महिलाले यस्तो रणनीति अपनाएको हुनसक्ने आशंका कम्पनीले व्यक्त गरेको छ ।
Discussion about this post