क्रिकेटर सन्दीप लामिछानेविरुद्ध दायर भएको जबर्जस्ती करणीसम्बन्धी मुद्दाको सुनुवाइ सकिएपछि न्यायाधीशहरूले होटलको सीसीटीभी फुजेट हेर्न थालेका छन् ।
दुई दिनसम्म दुवै पक्षका वकिलको लामो बहस सकिएसँगै फैसालको प्रतीक्षा भइरहेका बेला अन्तिम निर्णयका लागि न्यायाधीशहरूले इजलासमै सीसीटीभी फुटेज हेरिरहेका छन् ।
उच्च अदालत पाटनमा मंगलबार र बुधबार दिनभर भएको सुनुवाइका क्रममा बहस सकिएपछि फैसला लेख्ने तयारी हुँदैछ । यस्तोमा न्यायाधीशद्वय सुदर्शनदेव भट्ट र अञ्जु उप्रेतीले इजलासमा गौशाला २६ र सन्दीप बसेको भनिएको होटलको फुटेज अध्ययन गर्दैछन् ।
न्यायाधीशद्वयले सन्दीप र गौशाला २६ उक्त होटलमा पसेको र बाहिरिएकोसमेत अवस्थाको फुटेज हेरिसकेपछि फैसला दिने भएका छन् ।
इजलासमा फुटेज बजाउन समस्या भएपछि उच्च अदालत प्रशासनले बाहिरबाट प्राविधिकसमेत झिकाएको छ । प्राविधिकले फुटेज इजलासमै बज्ने व्यवस्था गरिदिएका छन् ।
यसअघि २०८० पुस २५ गते जिल्ला अदालत काठमाडौंका न्यायाधीशले पनि सन्दीपलाई बलात्कार प्रकरणमा दोषी ठहर गर्नुअघि उक्त सीसीटीभी फुटेज इजलासमै हेरेका थिए।
यस प्रकरणमा मंगलबार र बुधबार पक्ष-विपक्षका वकिलहरूले बहस गरेका थिए। जवाफी बहस पनि सकिएकाले फुटेज हेरिसकेपछि आजै फैसला आउने छ ।
त्यहीअनुसार उनीहरूले दुवै पक्षका वकिलहरूलाई समय निर्धारण गरिदिएर बहसमा बोलाएका थिए । दुवै पक्षका वकिललाई न्यायाधीशहरूले डेढ-डेढ घण्टाको समय दिएका थिए ।
२०८० पुस २५ गते जिल्ला अदालत काठमाडौंले जबर्जस्ती करणी मुद्दामा सन्दीलाई दोषी ठहर गर्दै आठ वर्ष कैद र तीन लाख रुपैयाँ जरिवाना तथा २ लाख रुपैयाँ क्षतिपूर्तिको फैसला सुनाएको थियो ।
सन्दीपले पीडितको कमजोर आर्थिक अवस्थाको फाइदा उठाएर बलात्कार गरेको ठहर गर्दै काठमाडौं जिल्ला अदालतले फैसला गरेको थियो । तर फैसला चित्तबुझ्दो नभएको भन्दै लामिछाने पुनरावेदनका लागि उच्च पुगेका थिए ।
यो मुद्दामा यदि उच्चले सफाइ दिएमा सन्दीपका लागि अमेरिका र वेस्टइन्डिजमा हुने टी-२० विश्वकप खेल्ने बाटो खुल्नेछ ।
यदि उच्चले पनि जिल्लाकै फैसला सदर गरिदिएमा सन्दीपका लागि अन्तिम अदालतको निर्णय कुर्ने विकल्प मात्रै रहनेछ ।
Discussion about this post