बरहथवा घटनामा जुट्यो सहमति, आन्दोलन फिर्ता

काठमाडौं – सर्लाहीको बरहथवा घटनामा पीडित परिवार र प्रशासनबीच ११ बुँदे सहमति भएको छ । आइतबार जिल्ला सुरक्षा समिति, पीडित पक्ष र आन्दोलित समूहबीच भएको छलफलमा ११ बुँदे सहमति भएको हो ।

पीडित परिवारको एकजना सदस्यलाई बरहथवा नगरपालिकाले रोजगारी उपलब्ध गराउने , गृह मन्त्रालयले गठन गरेको समितिलाई सबै पक्षले निष्पक्ष छानबिनका लागि सहयोग गर्ने लगायत ११ बुँदे सहमति भएको प्रमुख जिल्ला अधिकारी कोमलप्रसाद धमलाले जानकारी दिए।

उनका अनुसार आन्दोलित पक्षका मागको सम्बन्धमा स्थानीयस्तरमा सम्बोधन हुने माग तत्काल कार्यान्वयनमा लैजाने तथा स्थानीयस्तरमा पूरा गर्न नसकिने मागलाई केन्द्रमा सिफारिस गर्ने गरी सहमति भएको छ ।

आन्दोलनरत्त पक्षले सहमतिसँगै आन्दोलनको कार्यक्रम फिर्ता लिएको छ । गत शुक्रबार प्रहरीको गोलि लागेका ज्यान गुमाएका स्थानीय युवा व्यवसायी जयशंकर साहको शव पनि तीन दिन पश्चात प्रहरीले मुचुल्का गरी उठाउने तयारी गरिएको छ ।