नेपाललाई पाठ सिकाउने हार

११ कात्तिक, काठमाडौं । ‘वर्षभरि हाम्रो ब्याटिङ उत्कृष्ट थियो । आज पहिलो पटक मलाई ब्याटिङले निरश बनाएको अनुभव भयो । किनकी फिनिसिङ गर्न सकेनौँ । क्रिकेटमा यस्तो हुन्छ’, टी-२० त्रिकोणात्मक शृंखलाको फाइनलमा शुक्रबार यूएईसँग हारपछि नेपाली टिमका मुख्य प्रशिक्षक मोन्टी देसाइले भने ।

दशैँको अवसरमा खेलिएको हङकङसमेत सहभागी यस शृंखलामा लिग चरणभर अपराजित रहेको नेपाल फाइनलमा भने यूएईसँग ४ विकेटले पराजित हुन पुगेको थियो । उपाधिका लागि नेपालले दिएको १६३ रनको सामान्य लक्ष्य यूएईले १ बल खेल्नुअघि ५ विकेट गुमाएर भेट्टायो ।

फाइनल पुग्नुअघि नेपालले मूलपानी मैदानमा यूएई र हङकङलाई दुई-दुई पटक पराजित गरेको थियो ।

मोन्टी देसाइको आगमनपछि पछिल्लो एक वर्ष नेपालले ब्याटिङमा उत्कृष्ट प्रदर्शन गर्दै लिग टु मा सनसनीपूर्ण प्रदर्शन गर्दै विश्वकप छनोटमा पुगेको थियो । एसीसी प्रिमियर कप च्याम्पियन बन्दै एसिया कपमा छनोट भएको नेपालले भारत र पाकिस्तान जस्ता टिमसँग पहिलो पटक ओडीआई समेत खेल्यो ।

तर शुक्रबारको ब्याटिङले प्रशिक्षक मोन्टीलाई मात्र नभएर नेपाली समर्थकलाई पनि निराश बनायो । यो हार पनि कस्तो समयमा भयो भने आगामी वर्ष हुने टी-२० विश्वकपका लागि घरेलु मैदानमै हुने एसिया क्षेत्रको छनोटको पूर्व सन्ध्यामा ।

गत महिना चीनमा भएको १९औं एसियाडपछि नेपालको अधिकांश खेल टी-२० का छन् । १९ औं एसियाडपछि नेपालले ८ टी-२० आई खेल्दा यूएईसँग शुक्रबार भएको हार दोस्रो हो । एसियाडमा मंगोलियालाई र माल्दिभ्सलाई हराएको नेपाल भारतसँग भने पराजित भएको थियो ।

यूएईसँगको हार नेपालका लागि चेतावनीको संकेत मान्न सकिन्छ । हारले नेपाललाई पाठ पनि सिकाएको हुनुपर्छ कि खेलमा सधैँ एउटै अवस्था हुँदैनर सधैँ जित पनि हुँदैन ।

मूलपानीमा भएको चार खेल आरामले जितेर फाइनल पुगेको नेपालले उपाधि जित्ने धेरैको अनुमान थियो । तर ब्याटिङमा नेपालले ठूलो स्कोर बनाउन नसक्दा त्यसलाई रक्षा गर्न झन् कठिन भयो । नेपालले खेललाई अन्तिमसम्म पुर्यालएपनि खेल आफ्नो पक्षमा पार्न असफल रह्यो ।

‘टी-२० यस्तो गेम हो जहाँ हरेक चरणमा शतप्रतिशत दिनुपर्छ’, प्रशिक्षक मोन्टीले भने, ‘१३ औं ओभरमा रोहित र दीपेन्द्रको विकेट गुमाएपछि हामीमा प्रेसर पर्‍यो । त्यो दुई महत्वपूर्ण पक्ष रह्यो जसले गर्दा हामीले ठूलो स्कोर बनाउन सकेनौँ’, उनले भने ।

हारबाट सिकेको पाठ

१३ कात्तिकबाट काठमाडौंमै टी-२० विश्वकप एसिया छनोट हुँदैछ । त्यसै प्रतियोगिताको तयारीस्वरुप यो त्रिदेशीय शृखंला आयोजना गरिएको थियो । लिग चरणका खेल हेर्दा नेपालले एकपक्षीय रुपमै जित निकालेको थियो र दशैँमा समर्थकलाई खुशी दिएको थियो । फाइनलको एक मात्र हारले धेरैलाई निराश बनायो भने खेलाडीलाई राम्रो पाठ सिकायो ।

अब नेपालले विश्वकप छनोटमा यो गल्ती कमजोरीलाई सुधार गर्दै अघि बढ्नुपर्ने भएको छ । कप्तान रोहितले फाइनलको हार चेतावनीजस्तै जस्तै भएको बताए । ‘एक हिसाबले हाम्रो लागि यो अलार्म हो’, उनले भने, ‘विश्वकप छनोट हाम्रो लागि महत्वपूर्ण छ । अब हाम्रो ध्यान क्वालिफायरमा राम्रो गर्नेमा केन्द्रित हुनेछ ।’

त्रिकोणात्मक शृखंलामा पराजित हुँदा दु:खी भएपनि प्रशिक्षक मोन्टी देसाइले समग्रमा टी २० विश्वकप छनोटका लागि राम्रो तयारी भएको बताएका छन् ।

‘टी-२० छनोटलाई मध्यनजर गर्दा हामीले पछिल्लो एक महिना टी-२० फर्मयाटमा राम्रो तयारी गरेका छौँ । एसियन गेम्समा हामी भारतलाई हराउने नजिक पुगेका थियौं । नागपुरमा राम्रो तयारी भयो । यो शृंखलामा पनि समग्रमा राम्रो प्रदर्शन भयो’, मोन्टीले टी-२० मा कमब्याक गर्ने अवसर नहुने र सबै क्षेत्रमा राम्रो प्रदर्शन गर्नुपर्नेमा जोड दिए ।

अक्टोबर ३० देखि नोभेम्बर ५ सम्म (कात्तिक १३-१९) हुने टी-२० विश्वकप एसिया छनोटमा नेपालसहित एसियाका उत्कृष्ट ८ एसोसिएट राष्ट्रले प्रतिस्पर्धा गर्नेछन् । जसबाट फाइनल पुग्ने शीर्ष दुई टोली अर्को वर्ष वेष्ट इन्डिज र अमेरिकामा टी-२० विश्वकपमा छनोट हुनेछ ।

एसिया छनोटमा नेपाल समूह ए मा छ । नेपालसँगै ओमान, सिंगापुर र मलेसिया छन् । यूएई, हङकङ, बहराइन र कुवेत समूह बीमा छन् ।

नेपालले पहिलो खेल सोमबार बिहान ९ बजे कीर्तिपुरमा सिंगापुरसँग खेल्नेछ । समूह ए को सबै खेल, सेमिफाइनल र फाइनल कीर्तिपुरमा हुनेछ भने समूह बी को खेलहरु मूलपानी मैदानमा हुनेछ ।