उपप्रधान एवम् गृहमन्त्री नारायणकाजी श्रेष्ठले ललिता निवास जग्गा हिनामिना प्रकरणमा संलग्न जाेसुकै भए पनि नछुट्ने बताउनुभएकाे छ ।
ललितपुरको हात्तीवनमा रहेकाे निजी निवासमा आज शुक्रवार पत्रकारसँगको कुराकानीमा उपप्रधानमन्त्री श्रेष्ठले सरकारको ध्यान अब ललिता निवास जग्गा प्रकरणमा केन्द्रित भएको उल्लेख गर्दै प्रहरीले निष्पक्ष ढङ्गबाट अनुसन्धान अगाडि बढाएको बताउनुभयो । ‘हामीले प्रस्ट निर्देशन दिएका छौँ, कुनै राजनीतिक दबाब र प्रभावमा नपर्नु, राजनीतिक ‘कनेक्शन’ का आधारमा के गर्ने भनेर नसोच्नू’, उहाँले भन्नुभयो, ‘कुनै प्रकारको चलखेलले भूमिका खेल्न नपाओस्, स्वतन्त्र स्वच्छ अनुसन्धान गर्नुस्, जो दोषी छ, दोषीलाई कानुनको दायरामा ल्याउनका लागि निर्भिकताका साथ अगाडि बढ्नुस् भन्ने प्रहरीलाई निर्देशन छ ।’
उपप्रधानमन्त्री श्रेष्ठले ललिता निवासको जग्गा सरकारकै भएको दाबी गर्दै विभिन्न समयमा भएका छानबिन र प्रहरी अनुसन्धानले पनि प्रस्ट्याएको बताउनुभयो ।
श्रेष्ठले नक्कली भुटानी शरणार्थी प्रकरणमा गम्भीरताका साथ अनुसन्धान गर्न आफूले प्रहरीलाई निर्देशन दिएको उल्लेख गर्दै भन्नुभयो, ‘एउटा–एउटा ‘केस’ वा व्यक्तिका बारेमा हामी निर्देशन दिँदैनौँ । कुनै व्यक्तिलाई पक्रने कि नपक्रने, कुनै मुद्दामा अगाडि बढ्ने कि नबढ्ने भनेर हामीले निर्देशन नपर्खनु भनेको छौँ ।’
उहाँले भ्रष्टाचार नियन्त्रण, सुशासन प्रवर्धन र सामाजिक न्याय वर्तमान सरकारको प्रमुख कार्यभार रहेको समेत बताउनुभयाे । सरकारले सुशासनलाई पहिलो सर्त मानेर आफ्नो ध्यान केन्द्रित गरेको उहाँको भनाइ छ ।
Discussion about this post