काठमाडौं । झिसमिसेदेखि नै सेवाग्राहीले खचाखच भरिने राहदानी विभागमा अहिले भने चाप घटेको छ । विभागले फारम सङ्कलन विस्तार गरेसँगै यो चमत्कार भएको हो ।
केही महिना अघिसम्म सेवाग्राही पालो छिटो आउने आशले रातभर पनि विभाग परिसर मै जाग्राम बस्नेदेखि झिसमिसे मै लाइन बस्ने गरेका थिए । हिजो आज त्यस्तो अवस्था छैन । फारम भरेपछि राहदानी विभागले दिएको मितिमा ठ्याक्क विभाग पुगे राहदानी अर्थात् ‘पासपोर्ट’ हात परिहाल्छ ।
गएको माघ १६ गतेबाट राहदानी सङ्कलनको परिपाटी नै बदलिएपछि सेवाग्राहीलाई राहत मिलेको र चाप घटेको राहदानी विभागकी प्रवक्ता दुरपदा सापकोटाले बताईन् ।
उनले भनेकी छन्, “पहिले तीन दिनको लागि मात्र राहदानीको फारम सङ्कलन गर्ने गरेका थियौँ । माघ १६ गतेबाट एक महिनासम्म बुकिङ खुला गर्यौँ । त्यस कारणले पनि चाप घटेको हो ।” राहदानी लिनेको भीडभाड अध्ययन गर्न गठित टोलीले राहदानी वितरणको काम देशका सबै जिल्लाबाट गर्न सके भिडभाड कम हुने सुझाव दिएको थियो ।
राहदानी लिनेको भीड बढेकोबारे प्रधानमन्त्री तथा मन्त्रिपरिषद्को कार्यालय समेतले अनुगमन गरेको थियो । पहिले धेरै सेवाग्राहीले फारम भर्न नपाएको भन्दै गुनासो बढेपछि फाराम संकलनको परिपाटी नै फेरेको प्रवक्ता सापकोटाको भनाइ छ ।
उनले अगाडि भनिन्, ‘‘तीन दिनको मात्रै कोटा दिँदा सेवाग्राहीले फारम भर्न नपाएको भन्दै धेरै गुनासाहरु आए । त्यस कारण पनि एक महिनासम्मको लागि बुकिङ खुला गरेर सेवाग्राहीको चाप हेरौँ भन्ने सोचेर यस्तो गरिएको हो ।’
जिल्ला प्रशासन कार्यालयले समेत एक महिनाका लागि बुकिङ खुला गरेपछि केन्द्रको भीड जिल्लातिर बाँडिएको उनी बताउँछिन् । फारम भरेर आफु उपस्थित हुने मितिमा मात्रै सेवाग्राही विभाग आए पुग्ने भएकाले पनि भीड कम भएको प्रवक्ता सापकोटाको भनाइ छ ।
उनका अनुसार अहिले ७७ वटै जिल्लाका प्रशासन कार्यालय, १७ वटा इलाका प्रशासन कार्यालय र ३८ वटा विदेशस्थित कूटनीतिक नियोगबाट विद्युतीय राहदानी वितरण भइरहेको छ । अहिले राहदानी विभागबाट दैनिक झन्डै ६ हजार राहदानी छपाई हुन्छ । यस्तै प्रत्येक दिन झन्डै एक हजार पाँच सय राहदानी विवरण सङ्कलन भइरहेको छ ।
तत्काल आवश्यक नभए पनि भविष्यमा राहदानी आवश्यक पर्छ भन्ने लागेको भए आफ्नो जिल्लाबाटै फारम भरेर तोकिएको मितिमा विभाग आएर राहदानी लिन सकिने विभागले जानकारी दिएको छ । कसैलाई तुरुन्तै हतारमा राहदानी लिनु पर्ने भए फाराम भरेर कारणसहितको डकुमेन्ट लिएर विभाग आउन सकिने बताइएको छ ।
Discussion about this post