सहकारी ठगी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेले आफूलाई हिरासतबाहिर रहेर मुद्दा लड्ने व्यवस्था गरिदिन आग्रह गरेका छन् ।
जिल्ला अदालत कास्कीका न्यायाधीश हिमलाल बेलबासेको इजलासबाट आइतबार म्याद थपका लागि भएको थुनछेकको बहसका क्रममा उनले आफू भागेर कहीँ नजाने बरु सहकारीपीडितको पक्षमा लड्ने बताएका थिए ।
अदालतले १५ दिनको म्याद थपेर हिरासत पठाउनुअघि उनले आफूलाई थुनेर राखिँदा सहकारी पीडितलाई थप अन्याय भएको पनि बताए ।
सहकारी ठगी, सङ्गठित अपराध तथा सम्पत्ति शुद्धीकरणको मुद्दामा अनुसन्धामा रहेका पूर्व गृहमन्त्री लामिछाने उनका साझेदार एवम् पूर्वडीआईजी छविलाल जोशी, लीला पछाई र व्यवसायी रामबहादुर खनाललाई पनि अदालतले थप १५ दिन हिरासतमा राखेर अनुसन्धानको अनुमति दिइसकेको छ।
‘म हरेक अन्यायकाविरूद्ध लडिरहेको सिपाही हो । मेरो आवाज त आफैंले राख्न सक्छु, तर सहकारी पीडितको आवाज कसले बोल्ने ? सहकारी पीडितबारेमा सरकारले ध्यान नदिँदा ठूलो अन्याय भएको छ’, उनले भने, ‘म बाहिर रहेँ भने उनीहरूको आवाज मैले सुनेर सबैकहाँ पुर्याउन सक्छु । म बाहिर गएर कहीँ भाग्ने पनि होइन, मैले कुनै प्रमाण पनि नष्ट गर्दिनँ ।’
लामिछानेले आफू ग्यालेक्सी टेलिभिजनमा हुन्जेल कसैले पनि सहकारी ठगी प्रकरण नउठाएको जिकिर गरे ।
‘म टीभीमा हुन्जेल सहकारीको पैसा भनेर कोही हामीकहाँ भन्न आएनन् । मैले त्यसबेला पनि त्यस्तो केही छ भने लिएर आउनुस भनेको थिएँ, तर सूर्यदर्शन र सुप्रिम सहकारीका पीडितहरू पनि कोही आउनु भएन’, उनले न्यायाधीश बेल्बासेको इजलासमा भने, ‘जब म राजनीतिमा आएँ, तब यो मुद्दा उठाएर मसँग राजनीतिक प्रतिशोध साँध्न खोजियो । म त यो कानुनी लडाइँ लड्छ, तर सहकारी पीडितकोबारेमा कसले बोलिदिने ? मलाई हिरासत बाहिरै बसेर मुद्दा लड्ने वातावरण मिले न्याय हुन्थ्यो कि भनेको हुँ ।’
उत रविका साझेदार छविलाल जोशीले सहकारीको कारोबारसम्बन्धी सर्भर आफ्नो घरमा भेटिएको भनेर जबरजस्ती फसाउन खोजिएको जिकिर गरेका छन् । उनले भाडामा दिइएको घरमा भेटिएको सर्भरलाई आफ्नोमा भेटिएको भनेर प्रहरी र सरकारी वकिलले गलत कुरा उठाइरहेको पनि बताएका थिए ।
म्याद थपका लागि भएको बहसका क्रममा रविका निजी कानुन व्यवसायीहरूले बाहिरै राखेर अनुसन्धान गर्नुपर्ने तर्क र दलिल पेश गरेका थिए ।
‘अनुसन्धानका क्रममा आवश्यक भनिएका विवरण संकलन गर्नका लागि रविलाई हिरसातमा राखिरहनु पर्दैन । उहाँ भागेर पनि कहीँ जाने होइन, त्यसैले बाहिरै राखेर अनुसन्धान अघि बढाउनु उचित हुन्छ’, रविका निजी वकिलहरूले न्यायाधीशसमक्ष भने ।
उता सरकारी वकिलले भने कानुनअनुसार लाग्ने म्यादमै अनुसन्धान भइरहेको बताउँदै त्यसभित्र अनुसन्धान र अभियोजन गर्न पाइन्छ भन्ने जिकिर गरेका थिए । सरकारी वकिलले रविलाई थप २५ दिन म्याद मागेका थिए । तर रवि, छवि, लीला पछाई र रामचन्द्र खनाल चारैजनाको हकमा १५ दिन म्याद थपिएको हो ।
अदालतले रवि लामिछानेका हकमा यो पाँचौँ पटक म्याद दिएको छ । उता छविका हकमा सातौँ पटक म्याद थपिएको छ। रवि ३६ दिनदेखि कास्की प्रहरीको हिरासतमा छन् भने छवि ६२ औँ दिनदेखि हिरासतमा छन् ।
अब रविलाई काठमाडौं र चितवनमा बयानका लागि लाने सम्भावना छ । यदि कास्की अदालतले रविलाई थुनामुक्त गर्न भनेको भए पनि तत्कालै प्रहरीले नियन्त्रणमा लिएर काठमाडौं लाने तयारी थियो । तर अब रविलाई काठमाडौंको हकमा पक्राउ पुर्जी जारी भएकाले त्यता लगिनेछ । त्यसपछि फेरि पोखरा लगेर उनलाई पक्राउ पुर्जी जारी भएको चितवनमा बयानका लागि लगिनेछ ।
यस पटक अदालतले रविका लागि २३ मंसिरसम्मको म्याद दिएको छ । अब उनी मंसिर २४ गते जिल्ला अदालतमा पेश हुनुअघि यो १५ दिनबीचमा काठमाडौं र चितवनमा बयानका लागि पुग्नेछन् ।
Discussion about this post