इलाममा पौडी खेल्दा डुबेर दुई बालकको मृ’त्यु

इलामको माई नगरपालिकामा पौडी खेल्ने क्रममा डुबेर दुई बालकको मृत्यु भएको छ।माई नगरपालिका-८ का ११ वर्षे मिङ्सुहाङ लिम्बू र अन्दाजी आठ वर्षे किस्मन आङ्देम्बेको मृत्यु भएको प्रहरीले जनाएको छ।

मिङ्सुहाङ माई–८, बाँदरगाउँका विक्रम लिम्बूका छोरा हुन्। प्रहरीका अनुसार उनलाई पानीमा डुबेकै अवस्थामा फेला पारिएको थियो।

तत्काल उपचारका लागि स्थानीय मेडिकल लैजाँदा पनि उपचार सम्भव नभएपछि थप उपचारका लागि झापाको बिएन्डसी अस्पताल लैजाने क्रममा उनको बाटोमै मृत्यु भएको जिल्ला प्रहरी कार्यालयका डिएसपी प्रकाश जबेगूले बताए।

किस्मन स्थानीय राजेन्द्र आङदेम्बेका छोरा हुन्। त्यही स्थानमा पौडी खेल्ने क्रममा बेपत्ता किस्मनको शव खोजतलास गर्ने क्रममा इलामकै घिरलिङ भन्ने ठाउँमा फेला परेको प्रहरीले जनाएको छ।

उनीहरूसँगै पौडी खेल्न गएका अरू केही बालबालिकाको भने उद्धार गरी परिवारको जिम्मा लगाइएको छ।